БНСУ-ын Ерөнхийлөгч асан Мүн Жэ Иний охин Мүн Да Хэ нь буяны үзэсгэлэнгийн үеэр цуглуулсан хандивын мөнгийг зориулагдсан газарт нь өгөөгүй гэх хэрэгт холбогдон, цагдаагийн шалгалтад орж байгаа нь батлагдлаа.

Сөүл хотын Содэмүн дүүргийн цагдаагийн газар өнгөрсөн оны 10-р сард холбогдох өргөдөл хүлээн авснаас хойш мөрдөн шалгах ажиллагаа эхлүүлж, саяхан Мүн Да Хэг залилангийн хэргийн сэжигтнээр дуудаж мэдүүлэг авсан байна.

Тэрээр 2022 оны 12-р сард Содэмүн дүүрэгт өөрийн эзэмшлийн галерейд буяны үзэсгэлэн зохион байгуулж, уг үзэсгэлэнгийн борлуулалтын орлогыг хандивлана гэж амласан боловч энэ амлалтаа биелүүлээгүй гэсэн сэжиглэлтэй байна.

Цагдаагийн байгууллага түүний санхүүгийн гүйлгээг шалгаж, мөн үзэсгэлэнгээс уран бүтээл худалдан авсан хүмүүсийн дансыг хамтад нь шалгаж байгаа аж.