Өнөөдөр төв болон зүүн аймгуудын нутгаар түр зуурын бороо орж, Хараа, Ерөө, Туул, Тэрэлж, Сэлбэ, Улиастай, Сөгнөгөр, Хурх, Барх, Эг, Балж, Онон, Хэрлэн, Халх, Улз голын усны түвшин богино хугацаанд огцом ихсэж байна.

Иймд хуурай сайр гуу жалгаар уруйн үер буух нөхцөл бүрдэх тул гол мөрний эрэг хөвөө, хөндийгөөр суурьших айл өрх, аж ахуйн нэгж байгууллага үер усны аюулаас болгоомжтой байхыг ЦУОШГ-аас онцгойлон анхаарууллаа.

Хөвсгөлийн уулсаас усжих Үүр, Хэнтий нурууны баруун хажуугийн Хараа, Ерөө, Туул, Тэрэлж, Шарын гол, Сэлбэ, Улиастай, Хангай нуруунаас эхтэй Хөгшин Орхон, Богд, Таац, Заг голын усны түвшин өчигдөрийнхөөс 5-30 см нэмэгдэж, Тэрэлж, Сэлбэ, Туул гол Босгын гүүр орчимд олон жилийн дундаж түвшинг 25-30 см давлаа. Мөн Улз гол үерийн аюултай түвшинд хүрсэн хэвээр байгаа аж.

Өглөөний 8:00 цагийн мэдээгээр маргааш Туул гол Улаанбаатар хот орчимд усны түвшин 35 см, Хараа гол Дархан хот орчимд 20 см тус тус нэмэгдэх хандлагатай байна.