Монгол Улсаас хилийн чанадад суухаар шинээр томилогдсон Элчин сайд нар бэлтгэл ажлаа хангаж байна.

Гадаад харилцааны сайд Б.Батцэцэг санаачлан үүрэг болгосны дагуу Элчин сайд нар Бүсчилсэн хөгжлийн үзэл баримтлалд заасан 7 бүсэд ажиллаж, орон нутгийн нөхцөл байдал, бүтээн байгуулалттай танилцаж, гадаад харилцаа, хамтын ажиллагааг нь өргөжүүлэх, дэмжих боломжийг эрэлхийлэх юм.

Энэ хүрээнд Австри Улсад суух Элчин сайд Д.Мөнхтөр, Вьетнам Улсад суух Элчин сайд Г.Хулан, Киргиз Улсад суух Элчин сайд Д.Тэгшжаргал нарын бүрэлдэхүүнтэй эхний баг 2026 оны 03 дугаар сарын 02-06-ны өдрүүдэд Өвөрхангай, Баянхонгор, Архангай аймагт ажиллав.

Аймаг, орон нутгийн удирдлага шинээр томилогдсон Элчин сайд нарыг хүлээн авч уулзан, нутаг орныхоо онцлог, нийгэм, эдийн засгийн байдлын талаар мэдээлэл хуваалцаж, гадаад харилцаа, хамтын ажиллагаандаа тулгарч буй асуудлаар санал солилцов.

Багийн гишүүд төрийн байгууллагын ажилтан, албан хаагчдад олон улсын харилцааны өнөөгийн байдал, гадаад харилцаа, хамтын ажиллагааны үр шимийг орон нутагт хүргэх боломж, дипломат ёслолын талаар танилцуулан, сонирхсон асуултад хариулав. Түүнчлэн Өвөрхангай аймаг дахь мах боловсруулах үйлдвэр, Баянхонгор аймгийн “Вишн агро” ХХК, Ингэний сүүний үйлдвэр, “Ажилсаг” төв, “Сүлдэн тэнгэр” хоршоо, “Өлзийт” МСҮТ, Архангай аймгийн “Архангайд үйлдвэрлэв” төвийн гар урлал, ноос ноолууран бүтээгдэхүүний үйлдвэрлэлтэй танилцлаа.

Гадаад харилцааны сайдын баталсан Бэлтгэл ажлын төлөвлөгөөний дагуу шинээр томилогдсон нийт Элчин сайд нар орон нутагт ажиллахын зэрэгцээ Эрдэнэт үйлдвэр, Оюутолгой төслийн явцтай танилцаж, зарим хилийн боомтод ажиллана.

Мөн Элчин сайд нар төсөв санхүү, дипломат ёслол, консул, мэдээллийн аюулгүй байдал зэрэг чиглэлийн тусгайлсан сургалтад хамрагдаж, аж ахуйн нэгж, мэргэжлийн холбоодтой нэгдсэн уулзалт, арга хэмжээг зохион байгуулах юм.