Өмнөд Солонгосын ерөнхийлөгч асан Юн Сок Ёлын цагдан хоригдох хугацааг дахин хагас жилээр сунгах шийдвэрийг Сөүл хотын шүүх гаргасан тухай Yonhap агентлаг мэдээлжээ.

Түүнийг цагдан хорих хугацаа энэ сарын 18-нд дуусах ёстой байсан боловч нотлох баримтыг устгах магадлалтай гэж үзсэний дээр шүүх ийнхүү шийдвэрлэсэн байна.

Ерөнхийлөгч асныг “дронууд ашиглан тусгай ажиллагааг зохион байгуулж, Умард Солонгосыг өдөөн хатгах зорилготой байсан” гэж прокуроруудын тусгай баг дахин шинээр буруутгаж байгаа ажээ. Тусгай прокурор Чо Ин Сок-ийн мэдэгдсэнээр, ерөнхийлөгч асан уг ажиллагааг улс оронд дайны байдал зарлах шалтаг болгон ашигласан байна.

Юн Сок Ёл дронуудыг Умард Солонгос руу нисгэх тушаалыг цэргийн ангийн захирагчид өгсөн бөгөөд энэ тухайгаа Өмнөд Солонгосын Батлан хамгаалах яам, Штабуудын дарга нарын Нэгдсэн хороонд мэдэгдээгүй гэж прокурорууд үзэж байна.

Эргэн сануулахад, ерөнхийлөгч асныг “хуйвалдаан зохион байгуулж, эрх мэдлээ хэтрүүлэн ашиглаж, 2024 оны 12 дугаар сард түр хугацаагаар дайны байдал зарласан” хэмээн буруутгаж байгаа юм.  

Түүнийг хоёр дахь удаагаа 2025 оны долоодугаар сард баривчилснаас хойш тэрбээр хорионд байгаа ажээ. Юн Сок Ёлын эхнэр Ким Кон Хи мөн адил 8 дугаар сарын 12-ноос хойш хоригдож байгаа бөгөөд хувьцааны ханштай холбоотой луйвар хийсэн гэж түүнийг буруутгаж байгаа юм.