Comex таваарын биржийн арилжааны явцад гуравдугаар сард нийлүүлэх мөнгөний фьючерс гэрээний үнэ 5.83 хувиар өсөж, нэг унц нь 91.37 ам.долларт хүрсэн байна. Ингэснээр мөнгөний үнэ нэг унц нь 90 ам.доллароос давсан тохиолдол түүхэнд анх удаа бүртгэгдлээ.

Уг үнэт металлын үнэ дөрөв дэх өдрөө дараалан өссөн бөгөөд энэ хугацаанд 21.6 хувиар нэмэгдсэн байна. Зах зээлийн арилжаанд оролцогчид АНУ-ын Ерөнхийлөгч Дональд Трамп, Холбооны нөөцийн сангийн /ХНС/ захирал Жером Пауэлл нарын хооронд үүссэн зөрчил, Иранд үргэлжилж буй үймээн самуунаас шалтгаалан мөнгө худалдан авч байна гэж The Wall Street Journal сонинд дүгнэсэн байна.

АНУ-ын Колумбийн тойргийн прокурорын газар Холбооны нөөцийн сангийн Вашингтон дахь төв байрны засварын асуудлаар Жером Пауэллын эсрэг мөрдөн ажиллагаа явуулж эхэлсэн бөгөөд түүнийг төслийн хөрөнгийг хуурамчаар өсгөн мэдээлсэн хэмээн сэжиглэж байгаа тухай The New York Times сонинд дурдсан байна. Энэ нь АНУ-ын Төв банкны хараат бус байдлыг эргэлзээтэй болгож, “аюулгүй актив” буюу үнэт металлын үнэ өсөхөд нөлөөлсөн гэж шинжээчид дүгнэжээ.