Монгол, Оросын Засгийн газар хоорондын комиссын хуралдааны мөрөөр хэрэгжүүлэх ажлын төлөвлөгөөг батлахаар Засгийн газрын өнөөдрийн хуралдаанаас шийдвэрлэлээ.

Худалдаа, эдийн засаг, шинжлэх ухаан, техникийн хамтын ажиллагааны Монгол, Оросын Засгийн газар хоорондын комиссын 27 дугаар хуралдаан Улаанбаатар хотноо өнгөрсөн оны арванхоёрдугаар сарын 17-19-нд болсон. Тус хуралдаанаар Монгол, Оросын хамтын ажиллагаанд тулгамдаж буй асуудлыг хэлэлцэн, хоёр улсын хооронд төлбөр тооцооны механизмыг даруй бүрдүүлэх, түлш, эрчим хүчний салбарын хамтын ажиллагааны тогтвортой байдлыг хангах, зам тээврийн салбарын хамтын ажиллагааг эрчимжүүлэх, хөдөө аж ахуй, байгаль орчин, боловсрол, соёлын харилцааг идэвхжүүлэх, харилцааны шинэ боломжуудыг хайх талаар олон түвшинд дэлгэрэнгүй санал солилцож хэлэлцсэн нь ихээхэн ач холбогдолтой болсон гэж Засгийн газрын өнөөдрийн хуралдаанаас үзэв. 

Монгол, Оросын Засгийн газар хоорондын комиссын хуралдааны мөрөөр хийх ажлын төлөвлөгөөг баталж, хэрэгжилтэд нь хяналт тавьж ажиллахыг Шадар сайд, тус комиссын Монголын хэсгийн дарга Х.Ганхуягт даалгажээ.